Kåntan Chamoru: Hågu

Gof ya-hu este na kånta ginen as Flora Baza Quan. Annai hu hungok este gi ma’pos na såkkan, ti siña hu komprende. Hu aligao i pinila, lao ti hu sodda’. Magof yo’ sa’ maolekña i fino’-hu på’go na såkkan ya siña hu hungok i palåbra siha. Estague’ i pinilå-hu. Ekungok yan gosa!

Ekungok i tinige’-hu gi Chamoru.

Chamoru	Ingles
Hågu ni ti hu nanangga	You are the one I wasn’t even waiting for
Hågu fumanui hu manana	You are the one who showed me the daylight
Hågu muna’gaisabot lina’lå’-hu	You are the one who makes my life flavorful
Hågu fuma’nå’gue hu manguife ta’lo	You are the one who taught me to dream again
Hunggan hågu munå’i hu konsuelu	Yes you are the one who gave me consolation
Iya hågu na hu sodda’ i ånimu	It is in you that I found the courage
Fanhongge’ nu guahu sa’ guahu hu hongge hao	Believe in me because I am the one who believes in you
Ya hita na dos ti atrasao	And it’s not too late for the two of us
Hågu ni ti hu nanangga	You are the one I wasn’t even waiting for
Hågu fumanui hu manana	You are the one who showed me the daylight
Hågu muna’gaisabot lina’lå’-hu	You are the one who makes my life flavorful
Hågu fuma’nå’gue manguife ta’lo	You are the one who taught me to dream again
Hunggan hågu munå’i yo’ konsuelu	Yes you are the one who gave me consolation
Iya hågu na hu sodda’ i ånimu	It is in you that I found the courage
Kao un siesiente i sinientete-ku?	Are you feeling what I am feeling?
Fanhongge’ nu guahu sa’ guahu hu hongge hao	Believe in me because I am the one who believes in you
Ya hita na dos ti atrasao	And it’s not too late for the two of us
Ya hita na dos ti atrasao	And it’s not too late for the two of us
Ya hita na dos ti atrasao	And it’s not too late for the two of us
Hågu	You

Pinila / Translation

I really like this song from Flora Baza Quan. When I heard this last year I could not understand it. I looked for the translation, but could not find it. I am happy because my Chamorro is better this year and I can hear the words. Here is my translation. Listen and enjoy!